Ijtimoiy tarmoqlarda Chirchiq shahrida 3 nafar harbiy xizmatchi tomonidan bankomatlardan pul o`g`irlashga urinish holati sodir etilgani bo`yicha ma`lumotlar tarqaldi.
Holat yuzasidan Mudofaa vazirligi munosabat bildirdi.
Ma`lum qilinishicha, harbiy xizmatchilar toifasiga O`zbekiston Respublikasi Mudofaa vazirligi, Ichki ishlar vazirligi, Milliy gvardiya, Favqulodda vaziyatlar vazirligi, Davlat xavfsizlik xizmati, O`zbekiston Respublikasi Prezidenti davlat xavfsizligi xizmati va boshqa manfaatdor vazirliklar, idoralarning qo`shinlar tarkibida xizmat qilayotgan shaxslar kiradi.
Qo`lga olingan harbiy xizmatchilarning Mudofaa vazirligiga hech qanday aloqasi yo`q, ular Ichki ishlar vazirligi Qorovul qo`shinlari harbiy xizmatchilaridir.
“Yuqoridagilarni inobatga olib, ijtimoiy tarmoqlarda ma`lumotlar tarqatishdan avval harbiy xizmatchilar qaysi bir vazirlik yoki idora vakili ekanligi aniqlangandan so`ng, aniq faktlarga asoslangan holda tarqatilishi maqsadga muvofiqdir. Umumiy ravishda tarqatilgan ma`lumotlar barcha vazirlik va idoralarning harbiy xizmatchilari sha`niga putur etkazishi mumkin”, - deyiladi xabarda.
