Ukrainadagi mojaroning boshidanoq Turkiya “urushda g`olib bo`lmaydi, faqat tinchlik barchaga mag`lubiyatdan qochish imkonini beradi” degan tamoyilga amal qilgan. Bu haqda Turkiya prezidenti Rajab Toyyib Erdo`g`on BMT Bosh assambleyasi 77-sessiyasining umumiy siyosiy muhokamasi chog`ida so`zlagan nutqida aytib o`tdi.
U o`z mamlakatining muvaffaqiyatli vositachilik sa`y-harakatlarini eslab, ularni davom ettirishga tayyorligini bildirdi.
Erdo`g`onning so`zlariga ko`ra, turk diplomatiyasi va BMTning so`nggi paytlarda erishgan asosiy muvaffaqiyati Qora dengiz don tashabbusi bo`yicha kelishuv imzolanishini ta`minlagan Istanbul memorandumidir. “Ushbu yutuq tufayli jahon hamjamiyatining yordamiga tayanadigan odamlarning Birlashgan Millatlar Tashkilotiga ishonchi mustahkamlandi”, dedi Turkiya rahbari.
U bu muvaffaqiyat diplomatiya samaradorligini yana bir bor isbotlaganini ta`kidlab, "Zaporoje atom" elektr stansiyasi atrofidagi inqirozni hal qilishda, umuman olganda, “hududiy yaxlitlik tamoyili asosida urushni tugatish uchun xuddi shunday formuladan foydalanishni taklif qildi.
“Xalqaro tashkilotlar va barcha davlatlardan Turkiyaga uzoq muddatli tinchlikka erishish yo`lidagi sa`y-harakatlarida samimiy qo`llab-quvvatlashni so`rayman”, - deya qo`shimcha qildi Erdo`g`an. "Biz ikkala tomonga vaziyatdan munosib chiqib ketish imkoniyatini beradigan oqilona, adolatli va hayotiy diplomatik echim topish uchun birgalikda harakat qilishimiz kerak."
“Dunyo faqat beshta davlatdan (BMTning doimiy a`zolaridan) iborat emasligini tinim bilmay eslatishda davom etamiz”, — dedi Turkiya rahbari va xalqaro hamjamiyatni bu pozisiyani qo`llab-quvvatlashga chaqirdi.
Erdo`g`on o`z nutqida sayyoramizdagi boshqa mojarolarga to`xtalib, Bosh Assambleya a`zolarini uning mamlakati tinchlik tarafdori va boshqa davlatlarga bu maqsadga erishishda yordam berishga tayyor ekaniga ishontirdi. Xususan, Turkiyaning ko`magi va xalqaro hamjamiyatning yordami Suriya shimoli-g`arbidagi to`rt million tinch aholining omon qolishiga yordam berishini aytdi.
Erdo`g`on Janubiy Kavkazdagi vaziyatga ham to`xtalib o`tdi. “Ozarbayjonning bosib olingan hududlarini ozod qilishi Janubiy Kavkazda uzoq muddatli tinchlik va barqarorlikni ta`minlash uchun tarixiy oyna ochadi”, - dedi Turkiya rahbari. Uning so`zlariga ko`ra, Turkiya bu imkoniyatdan unumli foydalanishga intiladi va “Ozarbayjon va Armaniston o`rtasida kechayotgan jarayonlarni” qo`llab-quvvatlaydi. U “chegaradagi so`nggi to`qnashuvlar bu ijobiy muhitni buzganini” ta`kidladi, ammo Armaniston va Ozarbayjon o`rtasida keng qamrovli tinchlik kelishuvi hali ham mumkinligiga umid bildirdi.
