Toshkentning Shayxontohur tumanida IIO xodimlari ayol kishini uyidan majburiy olib chiqib, mashinada olib ketgani haqida xabar va holat aks etgan videolar ijtimoiy tarmoqlarda tarqaldi.
Toshkent IIBB matbuot xizmatining holat yuzasidan ma`lumot berishicha, 10 avgust kuni N.B. va Z.A. Shayxontohur tumani Janggoh mavzesida jamiyatda yurish-turish qoidalarini qasddan mensimasdan o`zaro janjallashib, jamoat tartibini buzgan. Tekshiruv jarayonida fuqaro N.B. chaqirilgan vaqtda ichki ishlar organlari xodimining IIBga ko`rsatilgan muddatda kelish to`g`risidagi qonuniy talablarini bajarmagan.
Ushbu fuqarolarga nisbatan Ma`muriy javobgarlik to`g`risidagi kodeksning 183-moddasi va 194-moddasi bilan ma`muriy bayonnoma rasmiylashtirilgan va ko`rib chiqish uchun jinoyat ishlari bo`yicha tuman sudiga taqdim etilgan. Biroq N.B. bir necha marotaba sud tomonidan chaqirtirilgan bo`lishiga qaramasdan, sababsiz sud majlisiga kelmagani sababli uni majburiy keltirish qarori chiqarilgan.
9 sentyabr kuni fuqaro N.B. IIO xodimlari tomonidan majburiy tartibda sudga olib ketilayotgani holati videoda aks etgan.
