Ijtimoiy tarmoqlarda "Cobalt" haydovchisi GAI xodimini avtomashina kapotida sayr qildirgani bilan bog`liq xabar tarqaldi.
Viloyat IIBning ma`lum qilishicha, hodisa Andijon shahrining Milliy tiklanish va Amir Temur shoh ko`chalari kesishmasida sodir bo`lgan.
Chorrahada xizmat o`tayotgan YPX inspektori Bobur maydonida xizmat olib borayotgan inspektorning xabariga ko`ra "Cobalt"ni to`xtatishga uringan, haydovchi oldiga kelib, bir necha bor ogohlantirish bergan, biroq haydovchi bunga bo`ysunmasdan harakatlangan.
Inspektor o`zini olib qochishga ulgurmagan. Natijada avtomashinaning oldi kapot qismiga osilib qolgan. Mashina joyidan keskin qo`zg`alishib, o`ng tomonga keskin burilgan vaqtida inspektor uning kapotidan sirpanib, yiqilib tushgan.
Voqea oqibatida inspektorning qo`l-oyoqlari jarohatlangan hamda jezl va aloqa vositalari sinib, shikastlangan.
Hodisa "qahramoni"ning bayonot berishicha, u mazkur harakatlari mashinani olib qo`yishlaridan qurqishi natijasida sodir qilgan.
“Misr davlatida Al-Azhar institutida o`qiyman. "GAI"ga bo`ysunmaganligim sababi voqeadan oldin mashina yoritgichlarini o`zgartirganim uchun inspektor to`sib, bayonnoma rasmiylashtirgandi. Bu safar ikkinchi marta to`xtatsa, mashinani olib kirib qo`yishi mumkin deb bo`ysunmasdan ketgandim”, — deydi haydovchi.
Hozirda holat yuzasidan O`zbekiston Respublikasi IIV ShXBB Andijon viloyati bo`yicha boshqarmasi hamda Andijon shahar prokuraturasi tomonidan tergovga qadar surishtiruv harakatlari olib borilmoqda.
Shuningdek, fuqaro K.V.ga nisbatan O`zbekiston Respublikasi MJtKning 194-moddasiga asosan ma`muriy bayonnoma rasmiylashtirilib, avtomashina vaqtinchalik jarima maydoniga joylashtirilgan.
