Buxoro shahrida 1 fevral kuni qurilish korxonasidan 150 million so`m pulini ololmagan erkak o`zini yoqib yubordi. Bu haqda Buxoro viloyat prokuraturasi xabar berdi.
Ma`lum bo`lishicha, 2022 yil 01 fevral kuni viloyat IIB navbatchilik qismiga fuqaro F.H. o`zini yoqib, tan jarohati olib, RShTYoIM Buxoro filialiga murojaat qilganligi to`g`risida xabar kelib tushgan.
Hodisa joyiga viloyat prokurorining o`rinbosari, viloyat prokuraturasi bo`lim boshlig`i, Buxoro shahar prokurori va IIO FMB boshlig`i hamda tergov - tezkor guruhi chiqishdi.
Aniqlanishicha, Peshko` tumanida yashovchi F.H. 2021 yil mart oyida quruvchi R.Shga uy olish maqsadida 150 mln. so`m pul mablag`larini bergan. Lekin R.Sh. uyni rasmiylashtirib bermaganligi sababli, pul mablag`larini qaytarishni so`rab, 2022 yil 01 fevral kuni takroran murojaat qilgan, R.Sh.dan rad javobini olinganidan so`ng, shu kuni soat 14:10 larda Buxoro shahar, “Furqat” mahalla fuqarolar yig`ini hududida o`zini ustidan benzin sepib, yoqib, o`z joniga suiqasd qilgan.
To`plangan hujjatlarga ko`ra, F.H. o`zini yoqib yuborgan paytida yonida o`g`li Z.A. bo`lganligi ma`lum bo`ldi.
Tibbiyot muassasasining dastlabki ma`lumotnomasiga ko`ra, F.H tanasining 50 foiz qismi kuyganligi ko`rsatilgan.
Mazkur holat yuzasidan Buxoro shahar prokuraturasi tomonidan JKning 103-moddasi 1-qismi bilan jinoyat ishi qo`zg`atilib, dastlabki tergov harakatlari olib borilmoqda.
Tekshiruv harakatlari viloyat prokuraturasi tomonidan alohida nazoratga olingan.
