19-20-21 октябрь кунлари хонанда Муниса Ризаева “Истиқлол” санъат саройида яккахон концерт дастурини уюштирди. Биз Мунисанинг туғилган кунини мўлжаллаб, атай концертнинг учинчи кунига ташриф буюрдик. Концерт бир сўз билан айтганда кутилмаган шоу ҳамда сюрпризларга бой бўлди...
Бу йил Муниса Ризаева иккинчи бор мухлисларга ўз яккахон концерт дастурини тақдим этиши. Концертнинг алоҳида эътиборга сазовор бўлган томони шу бўлдики, хонанда бу йил имкон қадар ўзини дадил тутиб, ўтган йилги концертида юз берган камчиликларини тўлдиришга, ортиқча бачкана имидж ва жимжимадорликдан ҳоли, кўпроқ ўз ижодий намуналари билан намоён бўлишга уринди. Демак, концертда биз ва мухлисларга манзур бўлган жиҳатларини санаб ўтамиз.
«Плюс»лар...
+ Концерт бошланишидан олдин чипталар нархи билан қизиқдик ва 20.000 сўмдан 180.000 сўмгача нархда белгиланган чипталарнинг бари концерт куни сотиб бўлинганини аниқладик. Бир зумда залдаги ўриндиқлар томошабинлар билан тўлиб, қолганлар тик оёқда концерт бошланишини кута бошлади.
+ Муниса концерт бошидан охиригача миллий ва замонавий услубдаги либосларда намоён бўлди. Раққосалар ҳам миллий услубдаги либосларда чиққанидан ўзбек замонавий эстрада хонандасининг концерт лойиҳасига миллий урғу беришга уринганини пайқаш мумкин.
+ Муниса шогирдим дея таништирган кўзбойлоғичларнинг чиқишлари, шунингдек, ранго-ранг рақслар концерт дастурига янада файз улашди. Comedy_uz гурухи резидентларининг чиқиши, уларнинг санъаткорлар ижросидаги ғализликларни нишонга олиб танқид қилиши мухлислар юзига табассум улашди.
+ Содда ва бежирим ясатилган декорация, ёрқин рангдаги чироқлар ва уларга ҳамоҳанг тарзда хит қўшиқларга уюштирилган романтик шоу рақслар, “Ёмғир” қўшиғи куйланганида саҳнада ёққан ёмғирлар мухлисларни ҳайратга солди.
+ Муниса Ризаеванинг ўтган йили тақдим этган концерт дастури бир оз зерикарли бўлиб, мақсадсиз “пауза”лар билан ўтган эди. Концертда шоу дастурлари ҳам киритилмаганди. Аммо бу гал хонанда ана шу камчиликларини тўлдириб, чунонам шоу уюштирдики, мухлислар кўзида ҳайрат билан ҳар бир жараённи кўздан қочирмасликка ҳаракат қилди.
Маълумки, гуруч курмаксиз бўлмайди. Шундай экан, концертда кўзга ташланган баъзи камчиликларни ҳам санаб ўтсак...
«Минус»лар...
- Comedy uz резидентларининг “Уммон” гуруҳи томонидан куйланган “Тола” қўшиғидаги сўзларни “депилляция” билан боғлаб ҳажвий талқин қилиши кўпгина мухлисларнинг ғашига тегди.
МУНИСАНИНГ ТУҒИЛГАН КУНИГА УЮШТИРИЛГАН “СЮРПРИЗ”!
Концерт Мунисанинг туғилган кунига тўғри келгани сабаб, режиссёр Рустам Шамсиддинов саҳнага чиқиб, концерт бош қаҳрамонига аталган кичик сюрприз борлигини маълум қилди. Шундан сўнг хонандага яқинлари, дўстлари, фан клуби аъзолари томонидан совғалар тақдим этилди. Режиссёрнинг эълонига кўра, одам бўйи баравар қути келтирилиб, унинг ичидан Мунисага аталган жонли қўғирчоқ чиқиб келди ва Мунисага совға тақдим этди. Бир оздан сўнг хонандага совға топширган бошқа бир йигит саҳнага чиқиб келди. Бу йигит саҳнага чиқиб, совға топширганда Муниса бир оз ҳаяжонлангани сезилди. Мунисанинг бу йигитни мухлисларга таништирмагани, охирги пайтларда ижтимоий тармоқдаги суратларида ҳам тез-тез у билан ёнма-ён суратга тушаётгани эса яқин орада кутилаётган янгиликлардан далолат бўлса ажабмас...
Хуллас, кўп ўтмай катта экранда “сюрприз-видеоролик” намойиш этилди. Унда Россия эстрада юлдузларидан Ани Лорак, Филипп Киркоров, Валерий Леонтьев, Стас Михайлов, Ани Лорак, Николай Басков ва бошқалар хонандани туғилган куни билан табриклади. Ушбу сюрприздан Муниса қувониб саҳнада ёш боладек сакраган бўлса, мухлислар ҳам олқишлаб, унинг қувончига шерик бўлишди. Биз эса ҳайратландик...
Концерт барча мухлисларга манзур бўлгани, мириқиб маданий ҳордиқ чиқарганини уларнинг кайфиятидан сезиш мушкул эмасдек. Биз ҳам Мунисанинг бу йилги концертидан кўнглимиз тўлиб, бу галги имтиҳонини аълога топширганидан хурсанд бўлиб қайтдик.
Аммо концертнинг эртасига актриса Шаҳзода Муҳамедова ижтимоий тармоқдаги ўз саҳифасига Мунисанинг концерт куни Россия юлдузлари табриклаган видеороликдан парча жойлаштирди. Ушбу видео мухлислар томонидан аёвсиз муҳокама қилинди. Видеороликни кўрган мухлислар эса унинг остида “Ахир бу видеролик интернетдан олинган-ку”, “Муниса, мухлисларни алдашга қандай ҳаддинг сиғди”, каби изоҳларни қолдириб, ҳатто “Мана, кўринглар” дея видеороликнинг интернетдаги манзилини қайд этиб ҳам қўйишди. Назаримизда ҳақиқатан ҳам бу совғанинг уюштирилганидан хонанданинг хабари бўлмаган. Чунки у ҳам бу видеороликнинг сохталигига амин бўлиб, мухлислар сингари “шок”ка тушиб қолганди. Муҳокамалар Мунисанинг жон-жонидан ўтиб кетди, шекилли, ўзини тутиб туролмади ва бир оздан сўнг у ҳам видео остига “Одамлар, уялмайсизми, туҳмат қилишга? Ҳаммангизин Худога солдим”, дея изоҳ қолдирди.
Биз ҳам қизиқиб, видеорликларни топиб кўрдик, дарҳақиқат, ушбу видероликдаги табриклар Филипп Киркоров, Стас Михаилов томонидан 50 ёшни қарши олган Россия эстрадаси юлдузи Лолита учун, Валерий Леоньтев, Ани Лорак, Николай Басков ҳамда бошқа россия юлдузларининг табриги эса Ирина Аллегрова учун аталган эди.
Бир оздан сўнг Шаҳзода Муҳаммедова ижтимоий тармоқдаги саҳифасига жойлаштирилган видеоролик йўқолиб қолди.
Бу масалага ойдинлик киритиш ва концертдан олдин интернет сайтлари хонанданинг жонли ижрода концерт бериши ҳақида ёзгани лекин у нега дастурда тўлиқ жонли куйламади деган савол билан концерт бош режиссёрига мурожаат этдик.
Рустам Шамсиддинов: — Бор-йўғи учта ашула фонограмма бўйича кетган. Сабаби, концертда шоу дастур уюштирилди. Масалан, Мунисанинг фан клуби аъзолари залнинг икки четидаги балкондан туриб “Эй само” қўшиғини фонограммада куйлашди. Кейин “Ёнар” қўшиғи ҳам фонограммада кетди. Сабаби, хонанда бу қўшиқ давомида ўзи ҳам саҳна кўринишини ижро этаётганди. “Сюрприз”га келадиган бўлсам, буни Мунисанинг фан-клуби аъзолари тайёрлашган. Нима мақсаддалигини билмадиг-у, табрикларни тўплаб, уни Мунисага қайта тақдим этишган.
Афсус... Балки режиссёр ва фан-клуби аъзолари сюрприз қилишмоқчи бўлишгандир, аммо бу Муниса учун омадсиз совға бўлди деб ўйлаймиз. Аниқроғи, аслида бошқа бир юлдузга аталган, интернетдан шундоқ кўчириб тақдим этилган ушбу совға дарҳақиқат Мунисани ноқулай аҳволга солиб қўйгани ачинарли бўлди.
Умуман, Муниса учун Россия юлдузлари табриклади, деган обрў керакмиди? Ушбу “сюрприз” ўзбек санъаткорлари билан ҳамкорликда тайёрланиб, ўзбек устоз санъаткорларининг табриклари тақдим этилганида мақсадга мувофиқ бўлармиди?
Хулоса ўрнида: Мунисанинг кейинги йилда тақдим этадиган концертида режиссёр ва фан-клуби аъзолари қандай сюрприз уюштиришидан қатъи назар эҳтиёткор бўлиши, бугуннинг томошабинини алдаб бўлмаслигини тушуниб етишини истардик.
Очиғини айтсак, концерт ёмон бўлмади. Муниса концертда ўзининг бор маҳоратини ишга солди ва тайёргарлик жараёнида у ва бошқа концерт иштирокчилари анчагина тер тўкканлиги сезилиб турди. Йил бўйи ғайрат билан тинимсиз ижод қилган, камига қисқа фурсатда концерт уюштиришга жазм этган Мунисанинг жасоратига қойил қолдик. Муниса дарҳақиқат бугунги кун эстрадасида энг тиниб-тинчимас, янгиликларга чанқоқ, серғайрат хонандалардан. Шунингдек, концерт ҳам шунга яраша қизиқарли бўлди. Биз эса хонанданинг кейинги ижод жараёнига омад ва муваффақиятлар тилаб қоламиз!
Моҳичеҳра ЭШМИРЗАЕВА тайёрлади
