“Юртимизда Қамчиқ довони орқали Ангрен-Поп темир йўл линияси қурилиш ишлари бошланганидан хабаримиз бор. Аммо бугунги кунда қурилиш ишлари қандай олиб бориляпти? Қурилиш ишлари қачон якунига етади? Шу ҳақда билмоқчи эдим.”
З.Хуррамова, Андижон ш.
Темир йўл тизимида амалга оширилаётган лойиҳалар нафақат юк ва йўловчи ташиш сифатини оширади, балки давлатимиз иқтисодиётининг ривожига ўз ҳиссасини қўшиб, аҳоли турмуш даражасини ҳам юксалтиради. Бугун ушбу соҳада амалга оширлаётган жуда кўп ишларни мисол қилиб келтириш мумкин.
Шу кунларда хитойлик ҳамкорлар билан биргаликда бунёд этилаётган “Ангрен — Поп” электрлаштирилган темир йўл линияси ана шундай ишлар сирасига киради.
Бугун эътиборингизга “Ўзбекистон темир йўллари” акциядорлик жамияти ахборот хизмати билан ҳамкорликда темир йўл қурилиши ҳақида қизиқарли фактларни эътиборингизга ҳавола этамиз.
- Ангрен-Поп темир йўли Президентимизнинг 2013 йил 18 июндаги “Ангрен — Поп” электрлаштирилган темир йўл линияси қурилишини ташкил этиш чора-тадбирлари тўғрисида”ги қарори асосида бунёд этилмоқда.
- Ушбу темир йўл тармоғи Фарғона водийсини Ўзбекистоннинг марказий қисми билан боғлайди.
- Темир йўл линиясининг умумий узунлиги 123,1 километрни ташкил этади.
- Мазкур йўналиши бўйича қурилаётган электрлашган темир йўли участкасида туннел узунлиги 19.1 километр бўлиб, у Қамчиқ тоғ довони орқали ўтади.
- Дунё рейтингида тоғли ҳудудларда жойлашган туннеллар рўйҳатида ушбу йўл мураккаблиги бўйича 8-ўринда, узунлиги бўйича эса 13-ўринни эгаллайди.
- Асосий туннелда шу кунгача қарийб 13 километр, қўшимча туннелда 14 километр масофада қазиш ишлари бажарилди. Туннелнинг 8 минг 600 метрлик қисмида пардозлаш ишлари амалга оширилди.
- Бугунга қадар бу ерда 43 миллион куб метр тупроқ ва 16,3 миллион куб метр бурғилаш-портлатиш ишлари, барча сув ўтказиш ва йўл ўтказгич иншоотлари, кўприклар қуриб битказилди.
- Ангрен-Поп йўли бўйлаб, “Орзу” вокзали, “Кўл”, “Темирйўлобод” ҳамда “Қўшминор” станциялари қурилди.
- “Ангрен” станциясидан туннелнинг ғарбий порталигача бўлган 39 километрлик масофага темирйўл ётқизилиб, кўприк, сунъий иншоотлар қуриш ва электрлаштириш ишлари тўлиқ якунига етди.
- Туннелни лойиҳалаш мазкур соҳадаги энг сўнгги тажрибаларига асосланган бўлиб, у ўз ичига хавфсизлик йўлакларини, галереяларни, вентиляцион хоналар ва муҳандислик коммуникацияларини олади.
- Янги пўлат магистраль Хитой – Марказий Осиё – Европа янги халқаро транзит темир йўл коридорининг муҳим бўғини бўлади.
- Марказий Осиёни Хитой билан боғлаш янги имкониятларини очади.
- Қурилишга 4250 дан ортиқ мутахассис ва 720 дона техник воситалар жалб этилган.
- Лойиҳа “Ўзбекистон темир йўллари” АЖ томонидан 2013 йил июлидан бошлаб амалга оширилмоқда.
- Лойиҳани амалга ошириш мақсадида 2015 йилнинг олти ойида 186,7 млн. доллар ўзлаштирилди.
- Қурилиш ишларини якунланиши 2016 йилнинг апрель ойига мўлжалланган.
