Тижорат банклари бугунги кунда фонд бозорининг энг фаол ва айни вақтда асосий иштирокчилари саналиб, “Тошкент” Республика фонд биржаси савдоларида уларнинг айланма маблағи муттасил ошиб бормоқда, дея хабар беради Марказий банк матбуот хизмати.
“Хусусан, жорий йилнинг ўтган олти ойи мобайнида фонд биржаси савдо айланмасининг умумий ҳажми 80,0 млрд. сўмни ташкил қилган ҳолда, унинг 94,8 фоизи ёки 75,8 млрд. сўмлик қисми айнан тижорат банклари қимматли қоғозлари билан амалга оширилган савдо битимлари ҳиссасига тўғри келди, - деди “Тошкент” РФБнинг Ахборот-таҳлил бўлими бошлиғи Ўктам Очилов. -Агар 2012 йилнинг 1 ярим йиллигида банк акциялари савдоси биржа битимлари умумий ҳажмининг 67,0 фоизини ташкил қилган бўлса, жорий йилнинг олти ойида бу кўрсаткич деярли 28 фоизга ортганини кўришимиз мумкин”.
Банк акцияларининг ишончли, барқарор ва даромадли эканлиги натижасида биржа савдоларида инвесторларнинг банк акцияларига бўлган қизиқиши тобора ортиб бормоқда.
“Таҳлилларга кўра, - дея давом этди Ў.Очилов, - фонд биржаси савдоларида инвестор сифатида жисмоний ва юридик шахсларнинг тижорат банклари қимматли қоғозларига бўлган қизиқиши ва ишончи ўсишда давом этмоқда. Хусусан, ўтган олти ой давомида биржа савдолари орқали жисмоний шахслар инвестицияларининг 91,2 фоизи, юридик шахслар инвестицияларининг 95,1% тижорат банклари қимматли қоғозларига йўналтирилган”.
Мамлакатимизда банк соҳасига кўрсатилаётган доимий эътибор туфайли тижорат банкларининг капиталлашуви ва айланма маблағларини кўпайтириш, кредит портфелларини соғломлаштириш ва даромадини ошириш бўйича аниқ чора-тадбирлар амалга оширилиши тижорат банкларининг янада ривожланиши ва фонд бозорида фаоллашувига кенг йўл очиб бермоқда.
“Ҳисобот даврида фонд биржасида энг йирик савдо битими “Ипотека-банк” АТИБнинг 43,1 млрд. сўмлик акциялари билан амалга оширилди, бу тижорат банклари қимматли қоғозлари билан амалга оширилган битимлар ҳажмининг 57 фоизини ҳамда умумий биржа айланмасининг 54 фоизини ташкил қилди”, - дея таъкидлади биржа таҳлилчиси.
Ўктам Очиловнинг қайд этишича, 2015 йилнинг I ярим йиллигида фонд биржаси савдоларида жисмоний шахсларнинг иштироки сезиларли даражада фаоллашиб, рўйхатга олинган умумий битимларнинг 80 фоизи ёки 1011 таси жисмоний шахслар томонидан амалга оширилган.
“Бу жиҳатдан, «Туронбанк» акциядорлик тижорат банкини мисол қилишим мумкин, - деди у. - Банкнинг 493 минг дона акцияси 647 нафар жисмоний шахс томонидан 756 та битим орқали 8,4 млн. сўмга сотилди”.
