Яқинда Ўзбекистоннинг Римдаги элчихонасида мамлакатимиз Олий ва ўрта махсус таълим вазирлиги ва Европа Иттифоқининг “Erasmus+” Миллий дастурларининг Тошкент шаҳридаги офиси ўзаро ҳамкорликда Италиянинг етакчи академик марказларидан бири бўлган Пиза университети билан ҳамкорликни йўлга қўйиш бўйича музокаралар ўтказди.
Пиза университети(Università di Pisa, UniPi) Пиза шаҳрида жойлашган итальян давлат тадқиқот ўқув юрти ҳисобланади. Унга 1343 йилда Рим папаси Климент VI буйруғи билан асос солинган. Мазкур таълим даргоҳи дунёдаги энг қадимги 19-университет ҳисобланади. Бу ҳақда ТИВ хабар берди.
Пиза университетида Галилео Галилей ўқиган ва фаолият юритган. Уни адабиёт ва физика йўналишларида Нобель мукофоти олган уч нафар машҳур шахс(Жосу Кардуччи, Энрико Ферми ва Карло Руббиа), Италиянинг икки нафар президент(Жованни Гронки ва Карло Азельо Чампи), икки нафар бош вазир(Жулиано Амато ва Энрико Летта), ушбу мамлакатнинг қатор вазирлари ва маданият намояндалари битириб чиққан.
Элчи Отабек Акбаров Пиза университетида ректор Паоло Манкарелла, проректорлар Франческо Марчеллони ва Марко Абате, шунингдек, геология, энергетика, муҳандислик, электр ва робототехника, шунингдек, халқаро ҳамкорлик бўйича департамент вакиллари билан учрашди.
Итальян томони Ўзбекистонда амалга оширилаётган кенг миқёсли ислоҳотлар, бу борада илм-фан, таълим, рақамли иқтисодиётга устуворлик берилаётгани, қатор хориж таълим муассасалари билан, жумладан, Ўзбекистонда уларнинг филиаллари ва қўшма факультетларини очиш йўли билан ҳамкорлик алоқаларини йўлга қўйиш бўйича маълумотларни катта қизиқиш билан тинглади.
Пиза университети раҳбарияти Тошкент шаҳрида Турин политехника университети фаолияти ҳамда унинг қошида “Ювентус” фубол клуби академиясини очиш, қолаверса, “Erasmus+” дастури доирасида Италиянинг қатор ОТМлари билан шериклик билан боғлиқ ижобий тажрибага алоҳида эътибор қаратди.
Бинобарин, Пиза университети ректори профессор Паоло Манкарелла Ўзбекистон билан ҳамкорликда таълим ва тадқиқотлар йўналишида узоқ муддатли ҳамкорликни йўлга қўйишга тайёр эканлигини билдирди. Унинг сўзларига кўра, бу йўлда тегишли ҳукумат ва ишбилармонлик доираларини жалб этган ҳолда ҳар икки давлат талабалари учун халқаро академик имкониятларни кенгайтириш ҳамда уларнинг профессионал жиҳатдан ривожлантириш бўйича институционал асосларни яратиш зарур.
Шу муносабат билан ректор Тошкент шаҳрида Пиза университети филиалини таъсис этиш имкониятларини эътироф этди. Бу икки давлат ўртасидаги ўқув ва илм-фан алоқаларини фаоллаштириш учун ажойиб платформа яратган бўлур эди. Унинг фикрича, бу университетнинг Италиядан ташқаридаги биринчи филиалига айланади ҳамда мазкур модель бошқа давлатларда ҳам қўлланиладиган моделга айланиши мумкин.
