Германиянинг Халле шаҳрида рўй берган отишма натижасида икки киши ҳалок бўлди. Бу ҳақда Ntdtv.ru нашри хабар берди.
Ҳужум яҳудийлар учун муҳим бўлган Йом-Киппур байрами нишонланаётган кун синагог яқинида рўй берди. Ҳужумни амалга оширган жиноятчининг ҳаракатлари эса видео кузатув камераларига муҳрланган. Ҳарбий кийимда бўлган ва бошига шлем кийиб олган шахс автомобилдан тушиб ўқ уза бошлаган. Гувоҳларнинг сўзларига кўра, жиноятчи яҳудийлар ибодатхонасига киришга уринган бироқ эшик ёпиқлиги сабабли уни очолмаган.
Шундан сўнг у яқин атрофдан ўтиб кетаётган аёлга қарата ўқ узган. Жиноятчи қўлбола портловчи қурилмани яҳудийлар қабристонига улоқтирган. Шундан сўнг яқин атрофдаги тамаддихонада эркак кишини отиб ташлаган. Ҳужум вақтида яна икки нафар киши жароҳатланган. Худди шу куни қўшни Ландсберг шаҳрида ҳам отишма рўй берди. Полиция ушбу икки ҳодиса ўртасида алоқа борлигини ҳозирча тасдиқламади. Ҳуқуқни ҳимоя қилувчи ташкилотлар томонидан ҳужумни амалга оширишда гумон қилинган шахс қўлга олинди.
