Юқори палата аъзолари “Психиатрия ёрдами кўрсатиш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонунни кўриб чиқди.
Қонун билан Жиноят, Жиноят-ижроия кодексларига ўзгартишлар киритилмоқда. Уларда нафақат руҳий касалликлар шифохонасида, балки тураржойидаги руҳий-асаб касалликлари диспансерида (туман (шаҳар) психиатрининг хонасида), яшаш жойидаги умумий тартибли руҳий касалликлар шифохонасининг умумий кузатиладиган бўлимида, умумий тартибли руҳий касалликлар шифохонасининг махсус реабилитация бўлимида тиббий йўсиндаги мажбурлов чораларини қўллаш ҳуқуқи назарда тутилмоқда.
Қайд этилишича, қонун қабул қилиниши руҳий ҳолати ақли расоликни истисно этмайдиган тарзда бузилган шахсларга нисбатан суд томонидан тиббий йўсиндаги мажбурлов чораларини қўллашга, бир вақтда уларни жазолаш имкониятини яратишга, психиатрия ёрдами кўрсатишнинг амалдаги тизими имкониятларидан тўлиқ ва оқилона фойдаланиш учун шарт-шароитлар яратади.
Шунингдек, тиббиёт муассасаларининг судлар, прокуратура органлари, адвокатлар ва тиббий йўсиндаги мажбурлов чоралари қўлланиладиган шахслар билан ўзаро муносабатларини тартибга солишга кўмаклашади.
Мажлисда сенаторлар мазкур ҳужжатнинг аҳолига психиатрия ёрдами кўрсатиш тизимини тубдан такомиллаштиришда муҳим аҳамият касб этишини таъкидлади. Хусусан, даволаш, профилактика ишлари ва руҳий ҳолатнинг бузилишини эрта аниқлашни ташкил этишнинг яхлит тизимини шакллантиришни таъминлаш орқали психиатрия ёрдами кўрсатиш тизими самараси ортади.
Қонун сенаторлар томонидан маъқулланди.
