Эрон бойитилган уран заҳираси миқдорини “ядро келишуви” да белгиланган миқдордан кўпайтиргани маълум бўлди. Буни МАГАТЭ вакиллари тасдиқлади. Бу ҳақда Еuronews.com. нашри хабар берди.
Маълумотларга кўра Теҳрон захираларни рухсат этилган 300 кг лик кўрсаткичдан оширган. Бироқ бойитилган урун захиралари аниқ қанча миқдорга кўпайтирилгани борасида маълумотлар мавжуд эмас. Бу расмий Теҳроннинг Вашингтонгга нисбатан ўзига хос жавоб чорасидир. Эслатиб ўтамиз, АҚШ ўтган йилнинг май ойидан эътиборан Эрон ядро дастури бўйича келишувидан бир томонлама чиқиб кетган эди. Вашингтон Ислом Республикасини мажбуриятларни бажармаётганликда айблаб, унга қарши янги санкцияларни жорий этган эди.
Европа Иттифоқи бундай ҳаракатларни қатъиян қоралади ва келишувни сақлаб қолиш бўйича барча чораларни кўришни маълум қилганди. “Европаликлар етарлича ҳаракат қилишмади. Шунинг учун Ислом республикаси ўз олдига қўйган режаларни амалга оширишга киришди. Биринчи фазада- бойитилган уран ва оғир сув захираси кўпайтирилади, иккинчи фазада эса бойитилган уран хажмини белгиланган миқдорда 3,67 фоизга оширамиз”, - дея таъкидлади Эрон ташқи ишлар вазири Муҳаммад Жавдад Зариф.
