Ўзбекистонда «Cengiz Enerji Sanayiive Ticaret A.Ş.» (Туркия) компанияси билан ҳамкорликда қуввати 240 МВт бўлган комбинациялашган иссиқлик электр станциясини қуриш режалаштирилмоқда. Ўзбекистон Республикаси Энергетика вазирлиги матбуот хизмати маълум қилмоқда.
Ўзбекистон Республикаси Энергетика вазирлигида Энергетика вазири Алишер Султонов ва «Cengiz Holding» компанияси таъсисчиси ва бошқаруви раиси Меҳмет Женгиз бошчилигидаги делегациянинг учрашуви бўлиб ўтди.
Учрашув якунида Энергетика вазирлиги ва «Cengiz Enerji Sanayiive Ticaret A.Ş.» компанияси ўртасида қуввати 240 МВт бўлган ИЭС қурилишини лойиҳасини давлат-хусусий шерикчилик асосида қуриш бўйича битим имзоланди.
Комбинациялашган иссиқлик электр станцияси қуриладиган жой сифатида Бухоро вилоятининг Когон туманидаги Қуйимозор сув омбори яқинидаги ҳудуд танланган.
Табиий газда ишловчи иссиқлик электр станцияси GE (АҚШ) да ишлаб чиқарилган газ турбинаси ва Siemens (Германия) компаниясида тайёрланган буғ трубинасини ўз ичига олади.
“Ўзбекистон Республикасининг Бухоро вилоятида қуввати 240 МВт бўлган ИЭС қуриш лойиҳасини амалга ошириш” бўйича битим жорий йилнинг 19 февраль куни Энергетика вазирлиги ва «Cengiz Enerji Sanayiive Ticaret A.Ş.» компанияси ўртасида имзоланган эди.
Қайд этиш керакки, Бухоро вилоятида қуввати 240 МВт га тенг бўлган иссиқлик электр станциясини қуриб фойдаланишга топширилиши мазкур ҳудудда электр энергиясига бўлган эҳтиёжни қондириш билан бирга магистраль электр тармоқлари орқали энергия етказиб беришда йўл қўйиладиган техник йўқотишларни камайтиришга хизмат қилади.
