Германия пойтахти Берлинда Қишлоқ хўжалиги вазирлиги, қишлоқ хўжалик экинлари навларини синаш Давлат комиссияси ҳамда Германиянинг "Bundessortenamt" қишлоқ хўжалиги экинларини синаш бўйича немис федерал маркази билан ҳамкорликда икки мамлакат иқлимига мос юқори ҳосилли, сифатли навларни ишлаб чиқариш ҳамда бу борада Ўзбекистонга Германия тажрибасини қўллаш масалаларига бағишланган учрашув бўлиб ўтди.
Учрашувда Германиянинг илғор тажрибаси ва технологияларини жалб этиш муҳим аҳамиятга эга экани таъкидланди.
- Биз Германиянинг ишончли шериги бўлишни хоҳлаймиз. Ўзбекистонда эса айнан қишлоқ хўжалиги соҳасини ривожлантириш учун кўплаб имкониятлар мавжуд. Биз қишлоқ хўжалик экинлари навларини синашда илк маротаба Германия билан ҳамкорлик қилмоқдамиз. Келажакда немис тажрибасини ўрганиш ҳамда уни юртимизда қўллаш биз учун муҳим, деди биз билан суҳбатда қишлоқ хўжалик экинлари навларини синаш Давлат комиссияси раиси ўринбосари Миржамшид Мурталибов.
Ўз навбатида, Германия қишлоқ хўжалиги ва озиқ-овқат вазирлигининг Миллий ва халқаро даражали мувофиқлаштириш маркази координатори доктор Стефан Хаффке Ўзбекистон билан бу йўналишда янги келишувга эришишга тайёр экани, келгусида ҳамкорликка оид меморандум имзоланиши кутилаётганини қайд этди.
Маълумот учун, қишлоқ хўжалик экинлари навларини синаш Давлат комиссияси 1937 йилда ташкил этилган бўлиб, барча экин навларини республикамизнинг турли иқлим-тупроқ шароитларида белгиланган услублар асосида ҳолис синов ишларини олиб бориб, юқори ҳосилли, эртапишар, касаллик ва зараркунандаларга чидамли, маҳсулот сифати юқори бўлган навларни танлаб олиб, ишлаб чиқаришга жорий этадиган ташкилотдир.
