Германияда тажрибамни оширяпман. Мунтазам юртимизда олиб борилаётган барча ислоҳотларни кузатиб бораман. Айниқса, соҳамдаги ўзгаришлар мени жуда қувонтиради.
Ушбу ислоҳотлар бошида турган муҳтарам Президентимизнинг биз ёшлар ва Ватанимиз келажаги учун тинимсиз қайғураётганлари мени ҳам ўзимни қийнаб бўлсада, қаттиқ изланишга ва юртимизга янги ғоялар билан киришга ундамоқда.
Муҳтарам Президентимиз ташрифларини жуда кутгандик. Аммо юртбошимиз билан кўришишимизга бўлган ишончимиз жуда кам эди. Лекин Берлиндаги ўзбек ёшларини Ўзбекистон ёшлар иттифоқи қошидаги Умумжаҳон ёшлар ассоциацияси бирлаштирди. Ҳаммамиз бирлашиб Президентимизни кутиб олдик.
Учрашув давомида муҳтарам Президентимиз биз билан жуда самимий суҳбат қилдилар. Суҳбат давомида биз каби хорижда таълим олиб юрган ёшларга бўлган эътиборлари бизни қувонтирди.
Биз ёшларни ҳар доим, ҳаттоки шу ташриф якунидаёқ бирга олиб кетишга тайёр эканликларини билдирганларида Ватанимиз учун нақадар кераклигимизни ҳис қилдик. Юртимизга, Президентимизга ишончимиз минг баравар ошди.
Нафақат бу сўзлар юксак ишонч, балки жуда катта куч, мотивация ва қаттиқ меҳнат қилиш учун илҳом берди. Учрашувдан сўнг барча ёшлар ўзида йўқ хурсанд эди. Келажакда юрти учун ушбу ривожланган давлатда тажриба орттириш ниятида кимдир кутубхонага, кимдир устози олдига, кимдир лабораторияга йўл олди.
Ушбу ташрифни биз узоқ йиллар унутмаймиз. Қалбимизда Она Ватан соғинчи янада кучайди. Мақсадимиз қатъий бўлди.
Ватанимга, албатта қайтаман ва унинг тараққиёти учун Президентим ёнида туриб меҳнат қиламан.
Аслиддин Бобочев,
Ҳумболдт университетининг
Қишлоқ хўжалиги иқтисодиёти йўналиши магистранти
22.01.2019. Берлин.
