Боғотлик, 1982 йилда туғилган, Ж.Х. анча йиллардан буён банк тизимида ишлаб, жамиятда ўзига ярашга обрў-эътиборга эга бўлганди. Унинг иш тажрибаси ва шахсий ҳислатлари инобатга олинган ҳолда бундан 3 йил олдин, вилоятдаги банклардан бирининг Ҳазорасп туманидаги филиалига бошқарувчи этиб тайинланган эди.
Аммо, мазкур банк филиали бошқарувчиси томонидан оқибатини ўйламасдан қўйилган бир қадам унинг йиллар давомида орттирган хурматига путур етказди.
Яъни, 2018 йил октябрь ойининг бошида у Ҳазорасп тумани қишлоқ хўжалик бўлимида ишловчи, С.М.га унинг банк пластик карточкасида бўлган 22 000 000 сўм пулларини нақдлаштириб беришини айтиб, ишончига кириб, пластик карточкаси олиб қолиб ундаги маблағларни ўз эхтиёжлари учун сарфлаб юбордию, пластик карточка эгасига нақд пул бериш навбати келганида, турли баҳоналарни рўкач қилиб, ўзини олиб қочиб юрди.
Фуқаро С.М.нинг мурожаати асосида ички ишлар органлари томонидан олиб борилган терговга қадар текширув ишларидан сўнг, банк филиали бошқарувчисига нисбатан Ўзбекистон Республикаси Жиноят Кодексининг 168-моддаси 3-қисми (Фирибгарлик) билан жиноят иши қўзғатилди.
Бу борада, Вилоят ИИБ ходими подполковник З.Исмоилов хабар қилди.
