“Google” компанияси “Google+” ижтимоий тармоғи фойдаланувчилар учун ёпилишини маълум қилади. Ушбу лойиҳа 2011 йилда жорий этилган бўлиб, 2019 йилнинг август ойига қадар ўз фаолиятини тўхтатади” деб “Google”нинг ишланмалар бўйича вице-президенти Бен Смит ўз блогида қайд қолдирди.
Бен Смит “Google+”нинг истеъмол варианти ёпилишига иккита сабаб келтирган. Биринчидан, хизмат фойдаланувчилар ичида оммалашмаган. Буни тармоқнинг 90 фоиз сеанси 5 секунддан ошмаслиги ҳам кўрсатмоқда. Иккинчидан эса лойиҳа кодида ўтказиб юборилган хатолик эвазига 2015-2018 йиллар орасида 500 мингга яқин фойдаланувчининг исм-шарифи, жинси, ёши, электрон почта манзили ва иш жойига оид шахсий маълумотлари чиқиб кетиши мумкин эди.
Бен Смитнинг сўзларига кўра, “лойиҳани ишлаб чиққанлар мазкур хатоликдан хабардор бўлган ва ундан ўз мақсадларида фойдаланган“ деган эҳтимолга ишонишга “Google“нинг асоси йўқ. Чунки 2018 йилнинг март ойида дастурдаги кемтиклик илк марта аниқланган бўлган.
“Google+”даги камчиликлар оммавий ошкор этилгунга қадар, “The Wall Street Journal” ҳам тармоқнинг тез орада ёпилишини хабар берганди. Нашр эҳтимолига кўра, агар компания дастурдаги хатоликни бир неча ой давомида сир тутмай, март ойининг ўзида маълум қилганида эди, тартибга солувчи органлар ва жамоатчилик эътиборини тортган бўларди. Боиси худди шу вақтда “Facebook” “Cambridge Analytica” айби билан шахсий маълумотлар кенг кўламда чиқиб кетганига иқрор бўлган эди.
