Доминикан республикасидан Италияга парвозни амалга ошираётган йўловчи ташувчи самолёт Испаниянинг Сантьяго-де-Компостела шаҳрига шошилинч равишда қўнди, деб хабар берди lenta.ru нашри.
Лайнер йўловчиси бўлган 23 ёшли аёл ўзини ёмон ҳис қилгандан кейин самолёт шошилинч қўнишга мажбур бўлган. Хабар берилишича, қиз гиёҳвандлик моддасини ошқозонида олиб ўтишга ҳаракат қилиб, гиёҳвандлик моддаси солинган пакетларни ютган. Бироқ самолёт ҳавога кўтарилгач, қизнинг ошқозонидаги пакетлардан бири ёрилиб кетган.
Операция жараёнида қизнинг ошқозонидан ҳар бирининг оғирлиги 15 граммдан бўлган 56 дона пакет топилган. Ҳозирда уни полиция сўроқ қилмоқда. У тақиқланган воситаларни ноқонуний равишда Европага олиб ўтишда абйланмоқда.
Қиз касалхонага ётқизилгандан кейин шошилинч қўнишни амалга оширган Blue Panorama авиакомпаниясининг самолёти Испаниянинг Сантьяго-де-Компостела шаҳридан Миланга учган.
