Марказий Африка Республикасининг пойтахти Банги шаҳридаги черковга ҳужум уюштирилди, деб хабар берди РИА новости нашри.
Хабар берилишича, ҳодиса туфайли 15 киши қурбон бўлган.
Нотре Дам де Фатима черковида жангарилар қурол билан одамларни ўққа тутган. Шундан сўнг, бино ичкарисига портловчи моддаларни улоқтиришган. 9 киши воқеа жойида ҳалок бўлган бўлса, қолган 6 киши касалхонада ҳаётдан кўз юмган. Қурбонларнинг икки нафари черков руҳонийларидир. Маълумотларга кўра, 50 киши турли даражадаги жароҳатлар олган.
Гувоҳларининг сўзларига кўра, ҳужумни икки киши содир этган. Улар мотоциклларда келиб, бино ичига қарата ўқ узишни бошлашган. Воқеа рўй берган вақтда черковда авлиё Жозеф куни нишонланаётгани сабабли бино одамлар билан гавжум бўлган.
Мазкур ҳужум учун жавобгарликни ҳозирча ҳеч бир террорчилик гуруҳи ўз зиммасига олгани йўқ.
