Хромтау тумани марказий шифохонаси бош шифокори ўринбосари Людмила Волненьконинг айтишича, кеча кечқурун турли даражадаги тан жароҳати олган 9 нафар Ўзбекистон фуқароси касалхонага келтирилган. Улардан уч нафари хотин-қиз, олти нафари эса эркак киши бўлган.
“Улардан бирининг жароҳати ўрта оғирликда эди. Қолганларининг эса қониқарли даражада. Жабрланганлар тунда бизнинг назоратимиз остида бўлишди.
Хотин-қизлардан бири бош мия чайқалиши жароҳати олган экан. У касалхонага қолишни рад этди.
Қолганларга тиббий ёрдам кўрсатилди. Уларда, асосан, бурун, қовурға синиши жароҳатлари аниқланди. Уларнинг аҳволи қониқарлилиги боис эрталаб жавоб бериб юбордик”, — дейди шифокор.
Эслатиб ўтамиз, Қозоғистоннинг Ақтўбе вилоятида ЙТҲ оқибатида автобус йўловчилари бўлган етти нафар Ўзбекистон фуқаролари турли даражадаги тан жароҳатлари билан Хромтау туман марказий касалхонасига ётқизилган. Автобус салонида 25 нафар йўловчи бўлган.
