Америкалик ёзувчи Стивен Кинг “Адабий фаолияти” учун Американинг PEN America ижтимоий ташкилотининг мукофоти лауреати бўлди, дея хабар бермоқда Тass.ru нашри.
Ушбу мукофот ўз асарларида инсоннинг энг яхши фазилатларини тарғиб қилган ёзувчиларга берилади. “Ёвузлик нима оқибатларга олиб келишини билган инсон сифатида Стивен Кинг бизни ёвуз кучларга қарши курашишга илҳомлантирди”, – дейди PEN America президенти Эдрю Соломон.
Келиб чиқиши портлендлик (Мэн штати) бўлган Стивен Кинг бутун дунёда 350 миллион нусхада чоп этилган 50 дан зиёд романлар муаллифидир. Унинг илк романи “Кэрри” 1970-йилларнинг ўрталарида ёзилган бўлса, кейинчалик ёзувчининг “Қора минора” циклидаги саккизта романи, “Шуъла”, “Тушлар овчиси”, “Яшил йўлак” каби бир-биридан ажойиб ва ғаройиб асарлари яратилди.
Стивен Кингнинг янги “Бегона” (The Outsider) номли китоби чоп этилгач, шу йилнинг 22 майида адибга PEN America мукофоти топширилиши маросими бўлиб ўтади.
