ОЛМАОТАЛИК ОЛТИНЧИ СИНФ ЎҚУВЧИСИ ПАРРАНДА ФАБРИКАСИ ОЧДИ

Ҳаммаси квадроцикл олиш орзусидан бошланган. Бор йўғи тўрт ой ичида ажойиб муваффақиятга эришган ўсмир бизнесини янада ривожлантириш ниятида.

Мирас (исми таҳ.) ҳар куни эрталаб фабрикасига киришни одатга айлантирди. Жўжаларнинг суви билан емини бергандан кейингина дарсига йўл олади. Қўлдан ясалган катакда 200 жўжа бор. Бройлер жўжаларига гўшт бозорида талаб катта. Айни пайтда жўжаларнинг дастлабки партиясини сотиб улгурган ўқувчи иккинчи партияни икки ойдан сўнг сотишни режалаштирмоқда, деб ёзади ЎзА.

"Мактабга кетиб, соат бешда келаман. Шундан сўнг ем-сувини яна янгидан бераман. Емига витаминлар аралаштираман", – дейди 6-синф ўқувчиси Мирас Кошербоев.

Жўжа боқиш фикрига келиши ҳам жуда қизиқ бўлган.

"Квадроциклим бўлса эди" деб орзу қилган Мирасга бувиси "пулни ўзинг йиғ, унинг учун биронта иш оч" деб маслаҳат беради. Шу тариқа, сентябрь ойида ўқувчи 100 та жўжа сотиб олади. Ҳовлисида кичикроқ катак қуриб, отаси ва бувисининг ёрдами билан ўз ишини бошлайди.

"Иккаламиз бориб сотиб олдик. Мен фақат маслаҳат бердим. Ҳамма ишни неварамнинг ўзи қилди. Биринчи партия қавм-қариндош, дўст-ёрондан ортмай қолди. Мираснинг қизиқиши шундан кейин янада ортди. Ҳозир харажатнинг ҳаммаси ўз қўлида. Чиқим-кирим харажатларини ўзи ҳисоблаб, ҳаракат қилиб юрибди", - дейди Мираснинг бувиси Бибинур Кошербоева.

Тадбиркорлар палатасининг вакиллари ёшларнинг бизнесга қизиқиши ортиб бораётганини таъкидламоқда.

"18 ёшга тўлмаган ёшлар бизнес билан шуғулланмоқчи бўлса, ота-онасидан рухсат олиши зарур. Ёшлар учун махсус мактаб бор. У ерда 18 ёшдан 29 ёшга қадар қабул қилинади. Лекин 18 ёшгача бўлганларни ҳам қабул қилишимиз мумкин. 12 ёшдаги бола ота-онасининг номидан очиш керак ёки 14 ёшга тўлгандан кейин хусусий тадбиркор сифатида рўйхатга олиниши мумкин", - дейди Олмата шаҳри тадбиркорлар палатасининг бизнес тренери Малик Мусабеков.

Мирас фаолиятини кенгайтириб, ғоз, ўрдак, курка парваришлашни ҳам режалаштирмоқда. Қишлоқ-хўжалиги маҳсулотлари билан савдо қиладиган хусусий дўкон очиш нияти ҳам бор.