Хитойда 6 метрли канализация қудуғига тасодифан тушиб кетган 2 ёшли қизалоқ қутқарилди, деб хабар берди Vesti.ru нашри.
Воқеа Хитойнинг Хэнань вилоятида содир бўлди. 2 ёшли қизча қурилиш майдончасининг ёнидаги канализация қудуғига тасодифан тушиб кетган.
Ҳодиса юз берган жойга етиб келган қутқарувчилар бир соат мобайнида қудуқ атрофида хандақ қазиб уни секцияларга бўлди ва қизчани соғ-омон қутқаришга муваффақ бўлди. Қудуқ диаметри 36 сантиметр бўлганлиги вазиятни оғирлаштирди, бундай ҳолда қизча ҳаво етишмаслигидан ҳалок бўлиши мумкин эди. Бунинг олдини олиш мақсадида у қўшимча кислород билан таъминланди. Сўнгги маълумотларга кўра, 2011 йилдан бери Хитойда қаровсиз қудуқларга тушиб кетиш оқибатида 35 нафар бола ҳалок бўлган. Аксарият кўнгилсиз воқеалар Хэнань вилоятида содир бўлган.
