Россиянинг Туркиядаги элчиси Андрей Карловни ўлдирган полициячи Мавлуд Мерт Алтинташ имтиҳонни муваффақиятли топшириб, Туркия президенти Ражаб Тойиб Эрдўғоннинг қўриқлаш хизматига ишга олиниш арафасида бўлган, деб ёзди “Вести”.
Бу ҳақда Туркиянинг Hurriyet газетасига террорчининг опаси Сахар маълум қилган.
Унинг сўзларига кўра, Алтинташ ва унинг дўсти Анқарада имтиҳон топшириб, ундан муваффақиятли ўтган эди. Бироқ уларнинг ҳар иккаласи ҳам полицияда бир йилдан кўпроқ вақт ишлаган бўлса ҳам президент қўриқлаш хизматига ишга олинмаган эди.
Россия элчисини ўлдирган террорчининг опаси шуни ҳам қўшимча қилдики, уларнинг оиласи динга кучли эътиқод қилиши билан ажралиб турмаган, бироқ полиция мактабида ўқиётган пайтда Алтинташ кунига беш маҳал намоз ўқиган.
Эслатиб ўтамиз, Россиянинг Туркиядаги элчиси Андрей Карлов 19 декабр куни кўргазма очилиш пайтида отиб ўлдирилган эди. Андрей Карловга “Россия қаҳрамони” унвони берилган.
