Давлат хавфсизлик хизмати Тошкент шаҳар бошқармаси ва Ички ишлар вазирлиги ходимлари ҳамкорлигида ўтказилган тезкор тадбирда 2003 ва 2007 йилларда туғилган шахслар нарколаборатория ташкил қилгани аниқланган. Манзилдан “закладка” орқали тарқатиш учун тайёрлаб қўйилган 1 кг “Мефедрон” синтетик гиёҳвандлик воситаси ҳамда лаборатория анжомлари ашёвий далил сифатида олинган.
Шунингдек, гумонланувчилардан бирининг телефонидаги геолокация маълумотлари асосида Бектемир туманидаги ариқ ичига яширилган яна 1 кг “Мефедрон” топиб олинган.
Тезкор тадбир давомида Юнусобод туманида хуфия жойларга яширилган наркотикларни олиб кетиш учун келган 6 нафар “закладчик” ҳам ушланган.
Ҳозирда мазкур шахсларга нисбатан Жиноят кодексининг 273-моддаси билан жиноят иши қўзғатилиб, тергов ҳаракатлари олиб борилмоқда.
