OpenAI компанияси томонидан ишлаб чиқилган ChatGPT чат-боти Япония университетларига кириш имтиҳонида тўққизта фандан энг юқори балл тўплади.
Сунъий интеллект тизимларини қиёсий синовдан ўтказган LifePrompt компанияси бу ҳақда ўз ҳисоботида маълум қилди.
Тадқиқотда ChatGPT, Gemini ва Claude Opus сунъий интеллект моделлари иштирок этди. Имтиҳон якунларига кўра, ChatGPT 15 та фандан 9 тасида энг юқори балл тўплади, унинг жавобларининг ўртача аниқлиги 97 фоизга етди. Энг юқори баллар математика, информатика, кимё, физика, биология, сиёсат ва иқтисодиёт йўналишларида қайд этилди.
Anthropic компанияси томонидан ишлаб чиқилган Claude Opus модели учта фан йўналишида максимал балл тўплади. Google Gemini иккита мавзуда мукаммал натижани кўрсатди.
ChatGPTнинг энг паст натижаси япон тилида бўлди — жавобларининг 90 фоизи тўғри. Тадқиқотчилар буни бадиий матнда қаҳрамонларнинг ҳиссий ҳолатлари ва уларнинг хатти-ҳаракатларини талқин қилишдаги қийинчиликлар билан боғлашди.
LifePrompt тўрт йилдан буён шундай имтиҳонлар ўтказяпти. 2024 йилда ChatGPT саволларнинг ўртача 66 фоизига тўғри жавоб берганди. Кейинги йили кўрсаткич 91 фоизга, бу йил 97 фоизга етди — моделнинг иш сифати жуда яхшиланиб бормоқда.
