Ижтимоий тармоқларда Тошкент шаҳрида номаълум шахс Ички ишлар бош бошқармасининг “102” рақамига қўнғироқ қилиб, АҚШ президенти Дональд Трамп устидан шикоят қилгани ҳақидаги аудиолар тарқалди. Мазкур ҳолат юзасидан фуқаронинг шахси аниқланиб, у маъмурий жавобгарликка тортилди.
Суд ҳужжатларига кўра, 2026 йил 7 январь куни Жиноят ишлари бўйича Бектемир туман судида кўриб чиқилган ишда фуқаро А.К. 6 январь куни маст ҳолатда “102” рақамига қўнғироқ қилиб, махсус хизматларни қасддан алдаб чақиргани маълум бўлган.
Суд фуқарони Маъмурий жавобгарлик тўғрисидаги кодекснинг 199-моддасига асосан айбли деб топиб, унга базавий ҳисоблаш миқдорининг уч баравари — 1 млн 236 минг сўм миқдорида жарима жазоси тайинлади.
