Германия канцлери Фридрих Мерс 12 январь куни Ҳиндистоннинг Аҳмадобод шаҳрида ўтказилган Халқаро варрак фестивалида қатнашди. Уни тадбир майдонида Ҳиндистон Бош вазири Нарендра Моди расман кутиб олди, дея хабар бермоқда Times of India.
Маълум қилинишича, фестивалнинг очилиш маросими етакчиларнинг Маҳатма Ганди билан боғлиқ муҳим масканлардан бири — Сабармати Ашрамига ташрифидан сўнг бўлиб ўтган. Тадбир давомида Моди ва Мерс очиқ транспорт воситасида сайр қилиб, варрак учирди ҳамда томошабинлар олқишига сазовор бўлди.
Шунингдек, фестиваль ҳудудида Аҳмадободнинг UNESCO жаҳон мероси рўйхатига киритилган Walled City қисмидаги анъанавий “пол” маҳаллаларининг ҳаётий нусхаси намойиш этилди. Нарендра Моди канцлерга варрак ясаш жараёнини кўрсатиб, Ҳиндистонда варрак учириш тарихини таништирди.
