Мазкур тасвирлар жамоатчилик орасида қизғин муҳокамаларга сабаб бўлди. Ҳолат юзасидан Коррупцияга қарши курашиш агентлиги муносабат билдириб, Вазирлар Маҳкамасига расмий мурожаат йўллади.
Агентлик давлат хизматчиларининг одоб-ахлоқ қоидалари бузилганини қайд этиб, вазирни интизомий жавобгарликка тортиш масаласини кўриб чиқишни таклиф қилган.
Шунингдек, унга қонунчилик талабларига қатъий амал қилиш бўйича огоҳлантириш бериш зарурлиги билдирилган.
Агентликка кўра, амалдаги қонунчиликка мувофиқ, давлат хизматчилари педагогик, илмий ва ижодий фаолиятдан ташқари бошқа ҳақ тўланадиган ишлар билан шуғулланиши мумкин эмас. Бундан ташқари, улар хизматдан ташқари вақтда ҳам давлат хизматининг нуфузига путур етказиши мумкин бўлган хатти-ҳаракатлардан тийилиши лозим.
Мазкур ҳолатга Маданият вазирлиги ҳам ўз муносабатини билдирди. Вазирлик матбуот хизматининг маълум қилишича, видео вазирлик ходимларидан бирининг тўйида олинган бўлиб, вазирнинг ушбу вазиятни олдиндан режалаштиргани йўқ.
“Видеода вазирга мухлислар томонидан пул узатилгани акс этган. Шу билан бирга, бундай ҳолатда фуқароларнинг хоҳиш-иродасини рад этиш уларни омма олдида ноқулай аҳволга солиб қўйиши, бу эса камситиш ёки менсимаслик сифатида нотўғри талқин қилиниши мумкин”, — дейилади вазирликнинг изоҳида.
Шунингдек, Маданият вазирлиги тўй маросимларида санъаткорларга пул бериш амалдаги қонунчиликда тақиқланмаганини, бу миллий урф-одатларнинг бир қисми эканини таъкидлади. Расмий муносабатда Озодбек Назарбеков нафақат вазир, балки таниқли хонанда экани, ушбу ҳолатни унинг ижодий фаолияти билан боғлиқ вазият сифатида баҳолаш лозимлиги қайд этилди.
Коррупцияга қарши курашиш агентлиги эса келгусида ҳам давлат хизматчиларининг хулқ-атвори ва ахлоқий меъёрларига риоя этилиши қатъий назорат қилинишини маълум қилди.
