26 декабрь куни Юн Сок Ёль фаолиятини тергов қилаётган махсус прокуратура жамоаси унга нисбатан 10 йиллик қамоқ жазосини сўради. Бу ҳақда The Korea Times нашри хабар берди. Прокурорлар собиқ президентни ҳибсга олиш ордери ижросига тўсқинлик қилиш, лавозим ваколатларини суиистеъмол қилиш ҳамда расмий ҳужжатларни сохталаштиришда айбламоқда.
Маълум қилинишича, айблов томони расмий вазифаларга тўсқинлик қилганлик учун 5 йил, ваколатларни суиистеъмол қилганлик учун 3 йил, ҳужжатларни сохталаштириш ва улардан ноқонуний фойдаланганлик учун эса 2 йил қамоқ жазосини тайинлашни талаб қилган. Прокурорлар Юн давлат институтларидан қонунбузарликларни яшириш ва конституциявий мувозанатни бузиш мақсадида фойдаланганини таъкидламоқда.
Айбловларга кўра, 3 январь куни Юн бир неча ҳафта давомида қароргоҳида қолиб, терговчиларни ичкарига киритмаган. Шунингдек, у президент хавфсизлик хизмати ходимларига терговчиларни тўсиб қўйишни буюргани айтилмоқда. Прокурорлар бу ҳолатни қонуний берилган ордер ижросига мисли кўрилмаган қаршилик сифатида баҳоламоқда.
Бундан ташқари, Юн ҳарбий ҳолат эълон қилиниши олдидан Вазирлар Маҳкамаси йиғилишида айрим вазирларни четда қолдирганликда, ҳарбий ҳолат бекор қилингач эса расмий ҳужжатларни орқа саналар билан сохталаштиришга уринганликда ҳам айбланмоқда.
Маълумот учун, Юн Сок Ёль ўтган йил 3 декабрь куни Жанубий Кореяда ҳарбий ҳолат эълон қилган, аммо у ортидан олти соат ўтиб бекор қилинган эди. 14 декабрь куни унга нисбатан импичмент эълон қилиниб, президентлик ваколатлари тўхтатилган. Ҳозирда собиқ президент бир нечта жиноят ишлари бўйича суд жараёнларига жалб қилинган.
