Россиялик машҳур актриса Вера Алентова 84 ёшида вафот этди. Бу ҳақда у 60 йилдан ортиқ хизмат қилган Пушкин номидаги Москва театри маълум қилди.
ОАВ хабарларига кўра, Алентова пайшанба куни театрда бўлиб ўтаётган хайрлашув маросими чоғида ўзини ёмон ҳис қилган. Шифокорлар уни қутқаришга уринган, аммо ҳаракатлар самара бермаган. Дастлабки маълумотларга кўра, ўлим сабаби ўткир юрак етишмовчилиги бўлган.
Вера Алентова ўнлаб фильм ва сериалларда роль ижро этган бўлиб, унга энг катта шуҳрат 1979 йилда суратга олинган "Москва кўз ёшларга ишонмайди" фильми орқали келган. Ушбу картина 1981 йилда "Оскар" мукофотига сазовор бўлган.
Актриса машҳур режиссёр Владимир Меншовнинг рафиқаси бўлган. Улар қарийб 60 йил турмуш қуриб яшаган. Уларнинг қизи — актриса ва телебошловчи Юлия Меншова.
