Тожикистон парламенти Жиноят кодексига киритилган ўзгартишлар билан қор қоплонини овлаш ва унинг ноқонуний муомаласи учун жавобгарликни кучайтирди. Бу ҳақда парламентнинг “Садои мардум” нашри хабар берди.
Янги таҳрирга кўра, 232-1-модда энди нафақат қор барсини овлаш ва қасддан йўқ қилишни, балки уни ноқонуний олиш, сақлаш, топшириш ёки сотишни ҳам ўз ичига олди. Ушбу қоидабузарлик учун 1200–1800 ҳисоб кўрсаткичи миқдорида жарима ёки 3 йилгача озодликдан маҳрум этиш жазоси белгиланди.
Агар жиноят такрор содир этилса, жарима 2000–3000 ҳисоб кўрсаткичигача оширилиб, 4 йилдан 8 йилгача қамоқ жазоси қўлланади. Шунингдек, айрим лавозимларда ишлаш ёки муайян фаолият билан шуғулланиш ҳуқуқидан маҳрум этиш ҳам назарда тутилган.
Бундан ташқари, алоҳида муҳофаза қилинадиган табиий ҳудудлар режими бузилган ҳолларда, катта миқдорда зарар етказилса, жарима миқдори ҳам оширилди.
