Дмитрий Песковнинг айтишича, Макрон Путин билан мулоқот қилишга тайёр эканини билдирган. Шу муносабат билан у Россия президентининг аввал ҳам бевосита диалогка очиқ эканини таъкидлаган. Песков фикрича, агар ўзаро сиёсий ирода мавжуд бўлса, бундай алоқаларни фақат ижобий ҳолат сифатида баҳолаш мумкин.
Орадан бир неча соат ўтиб, Франция президенти маъмурияти Москванинг мулоқотга тайёрлигини олқишлаб, яқин кунларда кейинги қадамлар бўйича қарор қабул қилиниши мумкинлигини маълум қилди. Шу билан бирга, Елисей саройи Россия билан бўладиган ҳар қандай музокаралар Украина президенти Владимир Зеленский ва Европа иттифоқчилари учун тўлиқ шаффофлик асосида ўтказилиши кераклигини қайд этган.
Эслатиб ўтамиз, Макрон 19 декабрь куни Путин билан суҳбат Европа хавфсизлиги учун фойдали бўлиши мумкинлигини айтган эди. Июль ойида эса икки давлат раҳбари уч йил ичида илк бор телефон орқали мулоқот қилиб, Украинадаги вазият ва Яқин Шарқдаги кескинликни муҳокама қилган.
