Марокашнинг Атлантика океани соҳилида жойлашган Сафи минтақасида кучли ёмғир ва момақалдироқ ортидан келиб чиққан тошқинлар оқибатида камида 21 киши ҳалок бўлди. Бу ҳақда маҳаллий ОАВлар хабар берди.
MEDI1TV телеканали маълумотига кўра, 14 декабрь куни Сафи минтақасида ёғган кучли ёмғир қисқа вақт ичида сув тошқинларига сабаб бўлган. Маҳаллий ҳокимиятлар қурбонлар сони 21 нафарга етганини тасдиқлаган.
Марокаш ОАВлари ёзишича, Сафи шаҳрида тахминан 70 та уй ва дўконни сув босган, 10 та автомобилни оқим олиб кетган. Шунингдек, йўл инфратузилмасига жиддий зарар етган.
Маълумотларга кўра, табиий офат оқибатида 32 киши жароҳатланган. Улар шифохоналарга ётқизилган бўлиб, зарур тиббий ёрдам кўрсатилгандан сўнг кўпчилиги уйига жавоб берилган.
Айни пайтда қутқарув хизматлари бедарак йўқолганларни қидириш ишларини давом эттирмоқда, шунингдек, табиий офатдан зарар кўрган ҳудудларга етиб бориш чоралари кўрилмоқда.
Эслатиб ўтилади, аввалроқ Ғазо ҳудудида 72 соат давом этган кучли ёмғирлар оқибатида юзага келган тошқинлар сабаб 14 киши, жумладан уч нафар бола ҳалок бўлгани ҳақида хабар берилган эди.
