Соғлиқни сақлаш вазирлиги маълумотига кўра, “Электрон рецепт” тизими дастлаб Тошкент шаҳри ва 15 та тажриба-синов туман (шаҳар)ларида жорий этилади. Шифокорлар дори воситаларини халқаро патентланмаган номланиши бўйича электрон рецепт асосида расмийлаштириб, ягона ахборот тизимига киритади.
Зарур техник имкониятлар мавжуд бўлганда, тиббиёт ва фармацевтика ташкилотлари ДМЕД ахборот тизимига бепул уланади ҳамда ССВнинг рақамли платформаси билан интеграция қилинади.
Электрон рецепт орқали бериладиган дори воситалари рўйхати босқичма-босқич шакллантирилади. Биринчи босқичда тизимли таъсирга эга антибиотиклар, синтетик антибактериал ва гормонал препаратлар учун электрон рецепт мажбурий бўлиши белгиланган.
Дорихоналарда рецептли дори воситалари электрон рецепт асосида, жумладан беморнинг ЖШШИРи орқали берилади. Тизим тўлиқ жорий этилгунга қадар ҳамда фавқулодда ҳолатларда қоғоз кўринишидаги рецептлардан фойдаланиш имконияти сақлаб қолинади.
Шунингдек, кеча-кундуз ишлайдиган 1003 Cалл-марказ фаолияти йўлга қўйилиб, у орқали беморлар масофадан туриб оилавий шифокорга мурожаат қилиши ва электрон рецепт олиши мумкин бўлади. Сурункали касалликларга чалинган беморлар учун эса 60 кунгача ёки 90 кунгача амал қиладиган электрон рецептлар бериш тартиби белгиланади.
Вазирликка кўра, “Электрон рецепт” тизими дори воситаларини тайинлашда хавфсизликни ошириш, уларнинг айланмасини тартибга солиш ва масъулиятни кучайтиришга қаратилган.
