Род-Айленд штатининг Провиденс шаҳридаги Браун университетида имтиҳонлар пайтида содир бўлган отишма оқибатида камида икки киши ҳалок бўлди ва саккиз киши оғир жароҳат олди. Расмийларга кўра, яна бир киши енгил жароҳат олган. Гумонланувчини қидириш ишлари олиб борилмоқда.
Отишма уюштирган шахс ҳали қўлга олинмаган; у қора кийим кийган эркак сифатида тасвирланган. CНН хабар беришича, гумондор ҳақида тафсилотлар ҳали ҳам кам. Университет расмийларининг сўзларига кўра, ҳалок бўлганлар ва ярадорлар талабалар эди.
Броwн университети Қўшма Штатлардаги энг нуфузли хусусий университетлардан бири ва Айви Лигаси аъзоси. Телевизион тармоқнинг таъкидлашича, у мамлакатдаги энг қадимги олий таълим муассасаларидан биридир.
Отишма муҳандислик ва физика факултетларининг биринчи қаватидаги синфхонасида содир бўлган, у ерда ўша куни тушдан кейин имтиҳонлар ўтказилиши режалаштирилган эди. Бир талаба маҳаллий WЖАР телеканалига полиция операциясини якунлашини кутиб, икки соат давомида столи остига яширинганини айтди.
Президент Доналд Трамп отишма ҳақида хабардор қилинганини айтди. "Қандай даҳшатли воқеа. Ҳозир биз қила оладиган ягона нарса - қурбонлар учун ибодат қилиш. Бу шармандалик", деди Трамп журналистларга.
Федерал ҳуқуқни муҳофаза қилиш органлари, жумладан, ФҚБ, маҳаллий ҳуқуқни муҳофаза қилиш органларига ёрдам беради.
"Жиноятчи ҳали ҳам озодликда", деди Провиденс мери Бретт Смайли журналистларга. У қурбонлар сони ортиши мумкинлиги ҳақида огоҳлантирди.
Полиция бошлиғи ўринбосари Тимоти О'Хара гумондорнинг шахси ҳали аниқланмаганини айтди. Полиция унинг тахминан 30 ёшда эканлигига ишонади, чунки у бинодан чиқиб кетаётгани кузатув камералари видеосига тушириб олинган.
