Бугун, 13 декабрь куни соат тахминан 16:30 ларда Тошкент вилояти Янгийўл тумани ҳудудидан ўтувчи М-34 “Тошкент–Душанбе” автомобиль йўлининг 10 км да йўл-транспорт ҳодисаси содир бўлди, дея хабар бермоқда Тошкент вилояти йўл ҳаракати хавфсизлиги бошқармаси.
Маълум бўлишича, 1984 йилда туғилган ҳайдовчи “Янгийўл–Тошкент” йўналишида “XCMG” русумли юк автомобилни бошқариб кетаётган вақтида, ўзи билан бир йўналишда ҳаракатланиб келаётган 1980 йилда туғилган ҳайдовчи бошқарувидаги “Isuzu” русумли автобуснинг орқа ён қисмига урилиб кетган.
Йўл-транспорт ҳодисаси натижасида автобусда бўлган 2 нафар йўловчига туман тиббиёт бирлашмасида тиббий ёрдам кўрсатилган. Ҳозирда уларнинг аҳволи яхши.
Мазкур ҳолат юзасидан Янгийўл тумани ИИБ томонидан терговга қадар суриштирув ишлари олиб борилмоқда, дейилади хабарда.
