Асарнинг илк тақдимоти жорий йил октябр ойида Исломободда бўлиб ўтган. Бугун Ўзбекистон Миллий кутубхонаси ушбу “Ўзбекистон: Учинчи Ренессанс — тараққиёт консепсияси” номли китобнинг ўзбек тилидаги тақдимоти бўлиб ўтди.
Покистон Бош вазири Муҳаммад Шаҳбоз Шариф китобга сўз боши ёзиб, "Мазкур китоб қадрдон дўстим, Жаноби Олийлари Шавкат Мирзиёев томонидан илгари сурилган Ўзбекистонда Учинчи Ренессанс пойдеворини яратиш ташаббусини, унинг ғоявий консепсиясини чуқурроқ англашга ёрдам беради. Ўзбек халқининг буюк аждодлари маънавий меросига таянадиган бу улуғвор ғоя бутун башариятнинг фаровон келажагига хизмат қилиши шубҳасиздир." - деб фикрларини билдирган.
Асарда, жумладан, Ўзбекистон миллий давлатчилик ривожининг уч минг йилдан зиёд тарихий тажрибасига оид қатор мисоллар келтирилади.
Тадбирда Покистон Президентининг Ахборот масалалари бўйича маслаҳатчиси, матбуот котиби М.Соланги билан бирга бир қатор Покистон мулозимлари қатнашиб китоб ҳақида фикрларини билдирди.
Муҳаммад Аббос Хон Покистон Ислом Республикасининг “Даилй Иттеҳад” газетасининг Ўзбекистон ва Марказий Осиё мамлакатларидаги махсус мухбиридир. Асарда "Инсоният тарихида давлат ёки империянинг мавжудлигидан ҳам барқарорроқ нарса — бор. Бу — буюк ғоялар.
Улар тарихнинг йўналишини ўзгартириб, келажакни шакллантира оладиган қудратли куч ҳам ҳисобланади. Ана шундай ғоялардан бири – Ўзбекистон Президенти Шавкат Мирзиёевнинг мамлакатда Учинчи Ренессанс пойдеворини барпо этиш ғояси, деб биламан. Зеро, Учинчи Ренессанс ғояси – вақт измига бўйсунмас абадий ғоядир. Менинг наздимда мазкур ғоя инсон тафаккурининг бемисл уммонига қуйилувчи қудратли дарёга ўхшайди" - деб ёзади муаллиф.
