Когон туманидаги портловчи моддалар ишлаб чиқарувчи цехда содир бўлган портлаш 4 кишининг ўлимига сабаб бўлди. Воқеа жойида ҳукумат комиссияси иш бошлади.
Бугун, 6 декабрь куни Бухоро вилояти Когон туманида жойлашган “Шаҳмс ЛТД” МЧЖга қарашли портловчи моддалар ишлаб чиқариш цехида кучли портлаш юз берди. Фавқулодда вазиятлар вазирлигининг маълум қилишича, ҳодиса соат 09:40 да “Мустақиллик” МФЙ ҳудудида содир бўлган ва оқибатда корхонада ишлаётган 30 ходимдан 4 нафари ҳалок бўлган.
Мазкур корхона 2019 йилдан буён Марказий Осиё ва Ўзбекистон тоғ-конь саноати корхоналари учун янги конларни ўзлаштиришда қўлланиладиган портловчи моддаларни ишлаб чиқариб келади.
Воқеа жойига зудлик билан етиб келган Бухоро вилояти ФВБнинг 7 та қутқарув бўлинмаси ёнғинни соат 10:27 да тўлиқ ўчирган. Портлаш натижасида енгил тан жароҳати олган 4 нафар ходим шифохонага етказилган. Улардан иккисига амбулатор ёрдам кўрсатилиб, уйига рухсат берилган.
Президент Шавкат Мирзиёев топшириғига кўра, ҳодиса бўйича Саноат хавфсизлиги қўмитаси раиси Абдуваққос Рафиқов бошчилигида ҳукумат комиссияси тузилди. Комиссия жабрланганларга ёрдам кўрсатиш, портлаш сабабларини ўрганиш, оқибатларни бартараф қилиш ва келгусида бундай ҳолатларни олдини олиш чораларини ишлаб чиқиш билан шуғулланади.
Ҳозирда ҳудуд тўлиқ назоратга олинган ва оқибатларни бартараф этиш ишлари давом этмоқда.
