Айримлар шартномани бекор қилган, бироқ ваъда қилинган пул ойлар давомида қайтарилмагани айтилади. Компания эса кечикишларни “ички жараёнлар” билан изоҳламоқда.
Мижозлар билдираётган фикрларга кўра, 2023–2024 йилларда турар жой лойиҳаларидан уй сотиб олган бир қатор харидорлар кейинчалик рухсат ҳужжатлари тўлиқ эмаслиги, жойлашув айтилгандек бўлмаганини билиб, шартномани бекор қилган. Аммо асосий савол — нима учун пул вақтида қайтарилмаяпти?
274 миллион сўм тўлов қилган аёлнинг айтишича, компания пулни бир ойда қайтаришни ваъда қилган, аммо орадан 10 ой ўтиб ҳам маблағ олинмаган. У компания вакиллари билан учрашишнинг ўзи муаммо бўлаётганини, айрим мулоқотларда босим сезилганини айтади.
Яна бир харидор — 100 миллион сўм тўлов қилган фуқаро — жойлашув ҳақидаги нотўғри маълумот сабаб шартномани бекор қилганини, аммо пулни ололмай бир неча ой қатнагани ҳақида гапирди.
Бошқа бир мижоз эса “Imarat Development” рекламалари асосида уй сотиб олганини, бироқ ваъда қилинган қурилиш ишлари ҳозиргача бошланмаганини айтади. Лойиҳа “суст кетаётгани”дан шикоятлар ортмоқда.
Мазкур эътирозлар оммага чиққач, Марат Ҳамдамов муаммоларни ҳал қилишини билдирган эди. Компания вакили ҳам айрим мижозларга пул қайтарилганини тасдиқлади, аммо қолганлари бўйича жараёнлар “юридик босқичда” экани айтилди.
Шу боис савол ҳануз очиқ қолмоқда: нима учун мижозлар пулини олиш учун ойлаб навбат кутиши керак?
Норозилик билдираётганлар сони эса ортиб бормоқда. Тармоқларда тарқалган видеоларда пулини талаб қилиб борганда соғлиги ёмонлашиб, тез ёрдам чақиртирган мижозлар ҳам кўринади.
Шу орада, Шаҳзода Муҳаммедова ҳолатга муносабат билдирар экан, ўзининг ижтимоий тармоқлардаги саҳифасида “Imarat Development”дан уй харид қилган фуқаролардан фикр ва муносабатини қолдиришни сўради.
