Science X журналида чоп этилган тадқиқотга кўра, узоқ вақт мобайнида ижтимоий тармоқларда бўлиш инсонда ташвиш, руҳий зўриқиш ва стресс ҳолатини келтириб чиқаради.
Мутахассислар “ижтимоий стресс индикатори” деб аталувчи янги рақамли тизим яратган бўлиб, у интернетдаги муҳокамалар ва изланишлар орқали жамият кайфиятини ўлчайди. Бу восита маълум мавзулар бўйича беқарорлик кучайишини олдиндан “сезиши” мумкин.
Олимлар таъкидлашича, ижтимоий тармоқлар эндиликда фақат мулоқот воситаси эмас — у жамоавий ҳис-туйғулар, қўрқув ва босимлар тўқнашадиган майдонга айланган. Шу боис стрессни рақамли муҳитда кузатиш муҳим аҳамият касб этмоқда.
Бироқ индикатор ҳали мукаммал эмас: у қисқа муддатли “ҳиссий портлаш”ларни дарҳол аниқлай олмайди ва баъзи ҳолларда троллинг ёки яширин нафратни тўғри баҳоламайди.
Олимлар фикрича, тизимни такомиллаштириш учун қўшимча тадқиқотлар талаб этилади. Шундагина у жамиятдаги руҳий беқарорликни барвақт аниқлаш ва уни юмшатишда самарали воситага айланиши мумкин.
