2025 йил 15 октябрь куни жиноят ишлари бўйича Поп туман судида наманганлик 50 ёшли эркак Россия Федерацияси қуролли кучлари сафида жангларда иштирок этгани учун суд ҳукми билан озодликдан маҳрум этилди.
Суд ҳужжатларига кўра, 50 ёшли Ш.М. 2025 йил апрель ойида Россияга ишлаш мақсадида борган ва моддий манфаатдорлик эвазига Россия Мудофаа вазирлиги билан шартнома тузиб, “оддий аскар” сифатида хизматга қабул қилинган. У Луганск шаҳрида ҳарбий тайёргарликдан ўтиб, кейин Украина ҳудудига жўнатилган.
Жанг ҳаракатлари вақтида, 2025 йил 9 май куни мина портлаши натижасида Ш.М. оёғидан яраланган ва Россиядаги ҳарбий госпиталларда даволанган. Шифохонадан чиққанидан сўнг, 30 суткалик таътилга юборилган ва шу даврда қилган иши хато бўлганини англаб, 4 июль куни Ўзбекистонга қайтиб келган.
У ўз ихтиёри билан ички ишлар органларига бориб, Россия армиясида хизмат қилганини тасдиқловчи ҳужжатлар — шартнома, ҳарбий жетон ва тиббий хулосаларни тақдим этган. Тергов давомида у хизмат учун 1 миллион рубль миқдорда пул олгани маълум бўлди.
Суд жараёнида Ш.М. айбини тўлиқ тан олиб, қилган ишидан чин кўнгилдан пушаймонлигини билдирган. Суд унинг қилмишини ЖКнинг 154-моддаси (чет эл ҳарбий хизматига кириш) ва 154¹-моддаси (ёлланиб қуролли тўқнашувларда иштирок этиш) билан квалификация қилди.
Наманган вилояти суди ҳукмига кўра, Ш.М. 3 йил 1 ой муддатга озодликдан маҳрум этилди. У жазони умумий тартибли колонияда ўтайди.
