4 ноябрь куни ўтган сайловларда 34 ёшли Зоҳран Мамдани республикачи Киркис Слива ва собиқ губернатор Эндрю Куомони ортда қолдирди. Дастлабки натижаларга кўра, у 49,7 фоиз овоз билан ғолиб чиққан.
Угандада ҳинд оиласида туғилган Мамдани машҳур кинорежиссёр Мира Наир ва олим Маҳмуд Мамданининг ўғли. У беш ёшида оиласи билан Жанубий Африкага, кейинроқ Нью-Йоркка кўчиб келган. АҚШ фуқаролигини 2018 йилда олган сиёсатчи 2020 йилда Нью-Йорк штати ассамблеясига сайланган эди.
Мамдани узоқ йиллар давомида кам таъминланган фуқароларга уй-жой масаласида ёрдам берган. Шу боис унинг сайловолди дастуридаги асосий мавзу ҳам арзон уй-жой муаммосини ҳал этиш бўлди.
У “Америка демократик социалистлари” ташкилоти аъзоси бўлиб, бойлар учун солиқларни ошириш, минимал иш ҳақини 2030 йилгача соатига 30 долларга етказиш ва бепул мактабгача таълим тизимини жорий этишни ёқлайди.
Мамдани Фаластин ҳуқуқларини очиқ қўллаб-қувватлагани учун Нью-Йоркдаги йирик яҳудий диаспораси орасида баҳс-мунозараларга сабаб бўлган. АҚШ Президенти Дональд Трамп эса уни “коммунист, ақлсиз” деб атаб, ғалаба қозонган тақдирда Нью-Йоркка қўшимча федерал маблағ ажратмаслигини билдирган.
Экспертлар фикрича, Мамдани ва Трамп ўртасидаги сиёсий қарама-қаршиликлар АҚШ сиёсатида янги тўлқинли баҳсларни келтириб чиқариши мумкин.
