Непалнинг шимоли-шарқидаги Долаха туманида жойлашган Ялунг Ри тоғида 4 ноябрь куни соат 09:00 да (ГМТ бўйича 03:15) қор кўчки юз берди.
Севен Суммит Трекс экспедиция агентлиги маълумотига кўра, ҳодисада жами етти альпинист ҳалок бўлган — уларнинг орасида икки италиялик, бир канадалик, бир германиялик, бир франциялик ва икки нафар непаллик йўлкўрсатувчи бор.
Қутқарувчилар ҳозиргача икки жасадни топган, қолганлари эса қор остида қолиб кетган бўлиши мумкинлиги айтилмоқда. Саккиз киши тирик ҳолда қутқарилган, улар пойтахт Катмандуга етказилиб, тиббий ёрдам кўрсатилмоқда.
Севен Суммит Трекс раҳбари Минма Шерпанинг сўзларига кўра, қолган беш жасад 3–4,5 метр чуқурликда бўлиши мумкин, бу эса қидирув жараёнини мураккаблаштирган.
Ҳудуддаги ёмон об-ҳаво ва логистик муаммолар туфайли қутқарувчилар воқеа жойига вертолёт орқали ҳам, пиёда ҳам етиб бора олмаган.
Kathmandu Post ёзишича, ҳалок бўлганлар 6332 метр баландликдаги Долма Кҳанг чўққисига чиқишга тайёрланаётган бўлган, Ялунг Ри тоғига чиқиш эса иқлимга мослашиш машғулотларининг бир қисми эди.
Шунингдек, мамлакатнинг ғарбий қисмида жойлашган Панбари тоғида ҳам икки италиялик альпинист бедарак йўқолган, уларни излаш ишлари давом этмоқда.
Сўнгги ҳафталарда “Монта” циклони сабабли бутун Непал бўйлаб кучли ёмғир ва қор ёғиши кузатилиб, сув тошқинлари ва кўчкиларга сабаб бўлди.
