Андижон шаҳрида ЗИЛ русумли юк машинаси ҳайдовчиси ухлаб қолиши оқибатида электр устунга урилди. Бу ҳақда вилоят Йўл ҳаракати хавфсизлиги хизмати хабар берди.
Маълум қилинишича, ҳодиса 3 ноябрь куни соат 22:15 атрофида Маданият маҳалласининг Олтинкўл кўчасида содир бўлган. 1963 йилда туғилган ҳайдовчи К.М. бошқарувидаги ЗИЛ 130 транспорт воситаси йўл марказидаги электр темир устунга бориб урилган.
Тўқнашув оқибатида ҳайдовчи енгил тан жароҳати олиб, шифохонага мурожаат қилган. Воқеа юзасидан Андижон шаҳар ЙҲХБ томонидан суриштирув ишлари олиб борилмоқда.
