Жорий йилнинг 2 август куни Навоий вилоятининг Зарафшон шаҳрида сув қувури ёрилиши оқибатида баъзи бир уйларни сув босган. Бу ҳақда Фавқулодда вазиятлар вазирлиги хабар берди.
Билдирилишича, тунги соат 01:50 да шаҳардаги “Ташқи сув таъминоти бирлашган энергия хизмати” 6-насос станциясига қарашли диаметри 1250 мм бўлган саноат-техник сув қувури ёрилиши оқибатида сув тошган.
Сув тошиши ортидан Тараққиёт кўчасидаги уйларнинг деворлари остидан сув сизиб чиққан натижада, баъзи уйларга зарар етган.
Вазирлик берган маълумотларга кўра, зудлик билан шаҳар ФВБ қутқарувчилари воқеа жойига етиб бориб, махсус техникалар ёрдамида ҳодиса оқибатларини бартараф этган. Тан жароҳати олганлар эса аниқланмаган.
