Бош прокуратура ҳузуридаги Департаментнинг маълум қилишича, Пахтаобод туманида ўтказилган терговга қадар текширувда аввал судланган О.Х. ва унинг шериги Т.К. фуқаро Б.М.ни алдаб, унинг турмуш ўртоғини Қирғизистондан Андижон давлат университетига ўтказиб бериш баҳонасида 2 500 доллар ва 9,6 млн сўмни ўзлаштирган. Ҳозирда ушбу маблағдан 700 доллар қайтарилиб, тегишли расмийлаштириш ишлари амалга оширилган.
Шунингдек, Қашқадарё вилояти Касби туманида ҳам шубҳали ҳолат қайд этилди. Фуқаро Н.Ғ. қўшни Қозоғистондаги олийгоҳда ўқигани ҳақида сохта ҳужжат тайёрлаб, Қаршидаги хусусий университетга қабул қилиш ваъдаси билан Қ.Ж.дан 1 000 доллар олган пайтда ашёвий далиллар билан ушланган.
Ҳар икки ҳолат бўйича Жиноят кодексининг тегишли моддалари — 168-модда (фирибгарлик) ва 28, 211-модда (пора бериш) асосида жиноят иши қўзғатилиб, тергов ҳаракатлари олиб борилмоқда.
