“Ўзбекистон темир йўллари” АЖ хабарига кўра, бугун, 30 июль куни соат 16:09 да Қорақалпоғистондаги “Бадай” ва “Беруний” станциялари оралиғида жойлашган 592-километрда КамАЗ юк машинаси ва йўловчи поезди тўқнашган.
Дастлабки маълумотларга кўра, юк машинаси ҳайдовчиси қўриқланмайдиган темир йўл кесишмасидан ўтишга уринган. Бу вақтда кесишмадан Андижон – Қўнғирот йўналишида ҳаракатланаётган, 150 нафар йўловчиси бор поезд ўтаётган бўлган.
Юк машинаси поездга урилиб, натижада тепловоз рельсдан чиқиб кетган. Ҳодиса оқибатида жабрланганлар йўқ. Поезд йўловчилари 6 та автобусда Нукус ва Қўнғиротга жўнатилган.
ИИВнинг Транспорт ва туризм объектларида хавфсизликни таъминлаш департаменти маълумотига кўра, поезднинг техник шикастлари соат 17:29 да бартараф этилган ва у “Беруний” бекатигача ҳаракатини давом эттирган.
