Ўзбекистонда президент мактабларига кириш имтиҳонининг 1-босқич натижалари чиқди. Бу ҳақда Мактабгача ва мактаб таълими вазирлиги хабар берди.
Бугун, 23 июль куни Cambridge халқаро таълим ташкилоти 6 июлда ўтказилган имтиҳон натижаларини эълон қилди. Саралаш жараёни тест синовлари асосида ташкил этилган. Натижалар ҳудудлар кесимида тақдим этилган. Президент мактабига кириш учун имтиҳон топширган номзод Cambridge сайтига кирган ҳолда идентификаторни қидириши керак.
Натижалар рейтинг тартибида юқоридан пастга қараб кўрсатилади. Кўк рангда кўрсатилган номзодлар президент мактабларига кириш бўйича асосий тест синовларига ўтади.
Президент мактабларига кириш имтиҳонларининг иккинчи босқичи 27 июль куни бўлиб ўтади. Имтиҳондан ўтиш учун 130 дақиқа вақт ажратилади:
- математика фанидан танқидий фикрлаш ва муаммони ечиш бўйича 40 та топшириқни бажаришга 90 дақиқа;
- инглиз тили фанидан грамматика (Grammar component) ва матн билан ишлаш (Reading component) бўйича 40 та топшириқни бажаришга 40 дақиқа берилади.
Талабгор имтиҳонга рухсатнома ва туғилганлик ҳақидаги гувоҳнома билан келиши керак.
Ҳар бир талабгорнинг ariza.piima.uz сайтига киритилган телефон рақамларига SMS-хабарнома юборилади. Шундан сўнг, имтиҳон ўтказиладиган жой номи ва вақти тўғрисидаги маълумотни шахсий кабинет орқали юклаб олиш мумкин. Тошкент вилояти ўқувчилари учун имтиҳонлар Тошкент шаҳрида бўлиб ўтади.
Маълумот учун, бу йил президент мактабларига ўқишга кириш истагидаги 49 минг 924 нафар талабгор ҳужжат топширган.
