Давлат хавфсизлик хизмати ходимлари томонидан божхона идоралари билан ҳамкорликда Фарғона вилоятида кучли таъсир қилувчи дори воситаларининг ноқонуний айланмасига қарши бир нечта тезкор тадбирлар ўтказилди.
Жумладан, Қўқон шаҳрида яшовчи, 1983 ва 1993 йилларда туғилган, муқаддам судланган 2 нафар фуқаро шахсий бойлик орттириш мақсадида ўзаро тил бириктириб, ўзбек-қирғиз давлат чегарасининг Қувасой шаҳри ҳудудидан ўтувчи қисмида аввалдан келишилган ҳолда, Қирғиз Республикаси фуқаросидан 8000 дона “Зардекс” кучли таъсир қилувчи дори воситаларини қабул қилиб олишади.
Сўнгра, ушбу дори воситаларини келгусида сотиш мақсадида Қўқон шаҳрида ижарага олинган хонадонга олиб борган вақтларида ушланди.
Қўқон шаҳрида кузатилган яна бир ҳолатда, маҳаллий адвокатлик бюроси адвокати ҳамда 1974 ва 1984 йилларда туғилган 2 нафар фуқаро ўзаро тил бириктириб, витамин дори воситалари кўринишида қадоқланган жами 4400 дона “Регапен” кучли таъсир қилувчи дори воситаларини 180 млн сўмга сотган вақтларида ашёвий далиллар билан ушланди.
Таъкидлаш лозимки, мазкур 3 нафар қонунбузарнинг барчаси муқаддам судланган шахслар ҳисобланади.
Бошқа ҳолатда эса Фарғона-Қўқон йўналишида ҳаракатланаётган, 1983 й.т., муқаддам Жиноят Кодексининг 273-моддаси 5-қисми билан судланган шахс бошқарувидаги автомашина Учкўприк тумани ҳудудида тўхтатилди.
Холислар иштирокида кўздан кечирилганда, автотранспорт воситасининг салон қисмида 100 дона “Тропикамид” ва 559 дона “Регапен” номли жами 110 млн сўмлик кучли таъсир қилувчи дори воситалари борлиги аниқланиб, тегишли тартибда олинди.
Тезкор тадбир давом эттирилиб, ушбу шахсга дориларни сотган - Фарғона туманида яшовчи, 1981 й.т. фуқаро Қўштепа туманида бошқа харидорга 1400 дона “Регапен” кучли таъсир таъсир қилувчи дори воситаларини 2800 АҚШ долларига сотган вақтида қўлга олинди.
Худди шу йўналишда ҳаракатланаётган яна бир автомашина ҳам Учкўприк тумани ҳудудида тўхтатилиб, кўздан кечирилганда, унинг салонида Қўқон шаҳрида яшовчи, мукаддам гиёҳвандлик воситалари билан боғлиқ жинояти учун судланган, 1981 й.т. шахсга тегишли умумий қиймати 75 млн сўмлик 250 дона “Тропикамид” кучли таъсир қилувчи дори воситалари борлиги аниқланиб, процессуал тартибда расмийлаштириб олинди.
Таъкидлаш лозимки, барча ҳолатларда кучли таъсир қилувчи воситалар Қирғиз Республикасидан олиб келинган.
Ҳозирда ушбу шахсларга нисбатан жиноят ишлари қўзғатилиб, қамоқ эҳтиёт чораси қўлланилди.
Тергов ҳаракатлари олиб борилмоқда.
